Pagmumuni-muni

Sa isang mundo kung saan normal na ang “gantihan” at “itama ang mali,” ang tawag ni Pablo sa mga mananampalataya ay hindi pangkaraniwan: Magtiisan. Magpatawad.

Hindi ito madali, lalo na kung malalim ang sugat o paulit-ulit ang pagkakamali ng iba. Pero ang sukatan ng pagpapatawad ay hindi ang bigat ng pagkakasala ng kapwa, kundi ang lawak ng pagpapatawad ng Diyos sa atin.

“Magpatawad kayo gaya ng pagpapatawad sa inyo ng Panginoon.”

Paano ba tayo pinatawad ng Panginoon?

• Buong-buo, walang kundisyon

• Hindi paulit-ulit na binabalikan ang kasalanan

• May layuning maibalik ang relasyon, hindi sirain ito

Kung ang ating Panginoong Hesu-Kristo, na walang kasalanan, ay pinatawad tayo ng lubos, sino tayo para tumangging magpatawad sa iba? Ang tunay na kababaang-loob at malasakit ay makikita sa kakayahang magpakumbaba at magpatawad, kahit mahirap.

1. Mayroon ka bang hinanakit sa isang tao na hindi mo pa pinapatawad?

2. Ano ang maaaring mangyari sa relasyon mo—at sa puso mo—kung pipiliin mong magpatawad ngayong araw?